ताप्लेजुङको आँखा शिविरमा ७६ जनाको आँखाको शल्यक्रिया
ताप्लेजुङ । ताप्लेजुङको सदरमुकाम फुङ्लिङस्थित डिचेन डोङ्गला आँखा उपचार केन्द्रमा सञ्चालित तिन दिने निःशुल्क आखा शिविरमा ७६ जनाको आँखाको शल्यक्रिया गरिएकोछ । नेपाल नेत्रज्योति सङ्घ ताप्लेजुङ, फुङ्लिङ नगरपालिका र सेवा फाउन्डेसन काठमाडौँको संयुक्त आयोजनामा सोमबार, मङ्गलबार र बुधबार गरी तीन दिन आँखा शिविर सञ्चालन गरिएको हो। शिविरमा आँखाको शल्यक्रिया गरिएकामध्ये ६२ जना मोतीबिन्दु भएका बिरामी र १४ जनाको आँखाको साधारण शल्यक्रिया गरिएको नेपाल नेत्रज्योति सङ्घ ताप्लेजुङ शाखाका सभापति राजकुमार गुरुङले बताउनुभयो ।
निशुल्क आखा शिविरमा ६७७ जना आँखाका बिरामीले सेवा प्राप्त गरेका डिचेन डोङ्गला आँखा उपचार केन्द्रका क्लिनिक इन्चार्ज काजीमान गुरुङले बताउनुभयो। गुरुङका अनुसार शिविरमा शल्यक्रिया र आँखाको उपचार तथा परीक्षण सेवा लिने पुरुष ३३५ जना र महिला ३४२ जना रहेका छन्। मेची आँखा अस्पतालका विशेषज्ञ डा समीर चापागाईँ नेतृत्वको टोलीले शिविरमा सेवा लिन आएका आँखाका बिरामीलाई सेवा प्रवाह गरेको नेत्रज्योति सङ्घले जनाएको छ।
