आगामी निर्वाचनका लागि एक करोड ८९ लाख मतदाता कायम

काठमाडौँ । निर्वाचन आयोगले आगामी फागुन २१ गते हुने प्रतिनिधि सभा सदस्य निर्वाचनका लागि अन्तिम मतदाता नामावली प्रकाशन गरेको छ। आयोगका अनुसार यस पटकको निर्वाचनमा कुल १ करोड ८९ लाख ३ हजार ६८९ मतदाता सहभागी हुन पाउनेछन्। यो अघिल्लो २०७९ को निर्वाचनको तुलनामा करिब ९ लाख १५ हजार बढी हो।
मतदाताको लैङ्गिक विवरण प्रकाशित अन्तिम नामावली अनुसार पुरुष मतदाताको सङ्ख्या ९६ लाख ६३ हजार ३५८ रहेको छ भने महिला मतदाताको सङ्ख्या ९२ लाख ४० हजार १३१ रहेको छ। त्यसैगरी, अन्यमा २०० जना मतदाता समावेश गरिएको निर्वाचन आयोगले जनाएको छ। आयोगले फागुन २० गतेसम्म १८ वर्ष उमेर पूरा हुने नागरिकहरूलाई समेटेर यो नामावली अद्यावधिक गरेको हो।
मतदान केन्द्र र स्थलको अवस्था आयोगका प्रवक्ता नारायणप्रसाद भट्टराईका अनुसार मतदाता नामावली ऐन, २०७३ को दफा २० बमोजिम शनिबारको बैठकले अन्तिम नामावली स्वीकृत गरी सार्वजनिक गर्ने निर्णय गरेको थियो। निर्वाचनका लागि देशभर १० हजार ९६७ मतदान स्थल र २३ हजार ११२ मतदान केन्द्र निर्धारण गरिएको छ। अघिल्लो निर्वाचनको तुलनामा यस पटक मतदान स्थल ७५ वटा र मतदान केन्द्र ८८५ वटाले वृद्धि गरिएको छ।

आयोगले मतदाताहरूको सहजताका लागि आफ्नो आधिकारिक वेबसाइटमा अन्तिम नामावली प्रकाशन गरिसकेको छ। सम्बन्धित मतदाताहरूले आयोगको वेबसाइटमा गएर आफ्नो प्रदेश, जिल्ला र वडा अनुसार मतदाता नामावलीमा आफ्नो नाम र मतदान केन्द्रको विवरण हेर्न सक्नेछन्।