फुङलिङ नगरपालिकाले सार्वजनिक सुनुवाई गदै

 ताप्लेजुङ । जनताको चासो, गुनासो र सुझाव सङ्कलनको लागि फुङलिङ नगरपालिकाले सार्वजनिक सुनवाई गर्ने भएको छ । फुङलिङ नगरपालिकाले जेठ ३० गते फुङलिङ नगरपालिका सामुदायिक हलमा फुङलिङ ,४,५,६र७ वडालाई  केन्द्रित गरेर सार्वजनिक सुनवाई गर्न लागेको हो ।

त्यस्तै फुङलिङ नगरपालिका १,२ र ३ वडालाई केन्द्रीत वडा न २ मा असार २ गते सार्वजनिक सुनवाई कार्यक्रम गर्न लागेको फुङलिङ नगरपालिका नगर प्रमूख अमिर मादेनले जानकारी गराउनुभयो । नगर प्रमुख मादेनले वर्ष भरी गरिएको कार्यका बारेमा वडा वडा के कस्ता राय सुझाव तथा जनताको चासो हुन्छ साथै स्थानीय सरकार नागरिक बीचको दोहोरो सम्बन्ध स्थापित गर्ने उद्देश्यले सार्वजनिक सुनवाई गर्न लागिएको बताउनुभयो ।
नगरपालिकाले दिने सेवालाई पारदर्शी जबाफदेहीता उत्तरदायी बनाउनका लागि सार्वजनिक सुनवाई कार्यक्रम गर्न लागिएको फुङलिङ नगरपालिकाका प्रमुख प्रशासकीय अधिकृत कृष्ण गौतमले बताउनुभयो ।
सार्वजनिक सुनवाई कार्यक्रमको सहजीकरण जानकारी मिडिया प्रालिले गर्ने छ । प्रालिका अध्यक्ष राजेन्द्र श्रेष्ठले नगरपालिकाको ११ वटै वडामा नागरिक अभिमत र वडा र नगरपालिकाबाट सेवा लिएर फर्किएकाहरूबाट बहिर्गमन अभिमत लिने काम भई रहेको समेत बताउनुभयो ।

सार्वजनिक सुनुवाइमा नगरबाट प्रदान हुने शिक्षा, स्वास्थ्य,खानेपानी तथा सरसफाइ ,रोजगार कृषि पशुपक्षी भौतिक पूर्वाधार विकास निर्माण सेवा प्रवाहको लगायतको बारेमा सेवाग्राही र सेवा प्रदायक बीच प्रश्नोत्तर हुने जसले गर्दा आगामी दिनमा नगरपालिकालाई काम गर्न सहज हुनेछ । नगरपालिकाले सबै आम नागरिकलाई कार्यक्रम उपस्थित हुनका लागि पत्राचार गरी सकेको समेत जनाएको छ ।