बेलायतमा फेरि एक महिना लकडाउन घोषणा
एजेन्सी। बेलायतमा फेरि एक महिना लकडाउन घोषणा गरिएको छ। बेलायती प्रधानमन्त्री बोरिस जोन्सनले यही नोभेम्बर ५ देखि कार्यान्वयन हुने गरी देशव्यापी नयाँ लकडाउनको घोषणा गरेका हुन्। शनिबार पत्रकार सम्मेलनमार्फत उनले बेलायतभर नै ६ जनाभन्दा बढी मानिसहरू सार्वजनिक स्थलहरूमा भेला हुन नपाइने आदेश जारी गरेका छन्।
लकडाउनमा बार, डिस्को, पव तथा रेष्टुराँ, जिम र अत्यावश्यक नठानिएका सबै पसलहरू बन्द गरिनेछन्। अत्यावश्यक काममा जानैपर्ने बाहेकका व्यक्तिहरूलाई घरमै बस्नुपर्ने छ। यो प्रतिबन्धमा स्कूल, कलेज र विश्वविद्यालयहरूले लागू नहुने बीबीसीले उल्लेख गरेको छ। प्रधानमन्त्री जोन्सनले आगामी क्रिसमस सम्ममा कोरोना भाइरस नियन्त्रण लिन सकिने आशा व्यक्त गर्दै क्रिसमसको समयमा पारिवारिक जमघट हुनसक्ने वातावरण बनाउन यो लकडाउनले सहयोग गर्ने आशा व्यक्त गरेका छन्।
बेलायतमा पछिल्लो २४ घण्टामा थप २१ हजार ९१५ जनामा संक्रमण पुष्टि भएको छ । योसँगै त्यहाँ कोरोना सङ्क्रमितको संख्या १० लाख ११ हजार नाघेको छ।
