नेपालमा थप ७४० मा कोरोना पुष्टि, सङ्क्रमित सङ्ख्या १५ हजार नाघ्यो
काठमाडौँ। नेपालमा पछिल्लो २४ घण्टामा देशभर गरिएको परीक्षणमा ७ सय ४० जनामा कोरोना सङ्क्रमण पुष्टि भएको छ। यो सँगै कुल सङ्क्रमितको सङ्ख्या १५ हजार २ सय ५९ पुगेको स्वास्थ्य तथा जनसङ्ख्या मन्त्रालयले जनाएको छ।
पछिल्लो २४ घण्टामा देशभरिबाट ८ सय २३ जना डिस्चार्ज भएका छन्। यो सँगै डिस्चार्ज हुनेको सङ्ख्या ६ हजार एक सय ४३ पुगेको मन्त्रालयले जनाएको छ। अहिले आइसोलेसनमा भएका सङ्क्रमितको सङ्ख्या ९,०८४ भएको मन्त्रालयले जनाएको छ।
अहिले सबै ७७ वटा जिल्लामा कोभिड-१९ पुगिसकेको छ। विभिन्न जिल्लामा ३५,००० भन्दा बढी व्यक्ति क्वारेन्टाइनमा रहेका छन्। तीमध्ये अधिकांश भारतबाट फर्किएका हुन्। मन्त्रालयका अनुसार विगत २४ घण्टामा ४,४८३ वटा नमुनाको पीसीआर विधिबाट परीक्षण गरिएको थियो।
