ताप्लेजुङको मैवाखोलामा दुई तले भवनको उद्घाटन

ताप्लेजुङ । ताप्लेजुङको मैवाखोला गाउँपालिका वडा नं १ स्थित जनकल्याण माध्यमिक विद्यालय तेल्लाबुङको नवनिर्मित विद्यालय भवनको उद्घाटन गरिएको छ । गत आर्थिक वर्ष २०७९/८० मा संघ, प्रदेश र स्थानीय सरकारको लगानीमा निर्मित २ तले ८ कोठे पक्की भवनको आज एक कार्यक्रमका बीच गाउँपालिका अध्यक्ष विजयप्रकाश वनेमले उद्घाटन गर्नुभयो ।
कार्यक्रमका प्रमुख अतिथि गाउँपालिका अध्यक्ष वनेमले अब विद्यार्थीहरुले पक्की भवनका कक्षाकोठामा पढ्न पाएको बताउँदै शैक्षिक गुणस्तर उकास्न लागिपर्नुपर्ने बताउनुभयो । मैवाखोलाको शैक्षिक विकासमा पालिकाले ध्यान दिएको बताउँदै सबैको साथ सहयोगले सामुदायिक विद्यालयको शैक्षिक स्तर उकास्न सकिने धारणा राख्नुभयो ।

कार्यक्रममा विशिष्ट अतिथि तथा वडा नं १ का वडाध्यक्ष चन्द्रकुमार तामाङले पक्की भवन निर्माण भएपछि विद्यालयको पठनपाठनमा सहजता आएको बताउनुभयो । भवन निर्माणका लागि तेल्लाबुङ कन्ट्रक्सनले १ करोड ५० लाख रुपैयाँमा ठेक्का लिएको थियो । समयमै भवन निर्माण गरी हस्तान्तरण गरिएको कन्ट्रक्सनका टंकप्रसाद खतिवडाले जानकारी दिनुभयो । विद्यालय व्यवस्थापन समितिका अध्यक्ष कृष्णकुमार वनेमको अध्यक्षतामा भएको कार्यक्रममा विद्यालयका प्रधानाध्यापक प्रेमबहादुर थोप्राले विद्यालयका गतिविधिका बारेमा जानकारी गराउनुभएको थियो ।nepaliportal