‘प्रचण्ड र नेपाल देउवाको कमैया बसेकाले तत्काल वाम एकताको सम्भावना छैन’
रामेछाप । नेकपा एमालेका सचिव योगेश भट्टराईले माओवादी केन्द्रका अध्यक्ष पुष्पकमल दाहाल ‘प्रचण्ड’ र एकीकृत समाजवादीका अध्यक्ष माधवकुमार नेपाल कांग्रेसका सभापति शेरबहादुर देउवाकोमा कमैया बसेको टिप्पणी गरेका छन्। प्रेस चौतारी रामेछापले आइतबार आयोजना गरेको पत्रकार भेटघाटमा बोल्दै भट्टराईले प्रचण्ड र नेपाल देउवाको कमैयाबाट नछुटुन्जेल वाम एकताको सम्भावना नरहेको बताएका हुन्।
कमैया र हलिया प्रथाको आन्दोलन गरेका मान्छेहरूनै आफैं कमैया बसेको भट्टराईको टिप्पणी छ । वर्तमान सरकारले नागरिकता जस्तो कुरामा बल मिचाइँ गरेर विधेयक अगाडि बढाएर ठूलो गल्ती गरेको बताए ।
प्रधानमन्त्री देउवा नेतृत्वको सरकारले देशलाई खण्डित गरेको र असंवैधानिक गठबन्धन गरेको आरोपसमेत भट्टराईले लगाए । उनले यो विधेयकलाई संशोधन र परिमार्जन गर्न पनि मंसिर ४ गते हुने चुनावमा बहुमत ल्याउने बताए । एमालेको अहिलेको प्राथमिकता निर्वाचन भएकाले कुनै दलसँग गठबन्धनको प्रस्ताव नगरेको पनि भट्टराईले बताए ।
मंसिर ४ गते हुने निर्वाचनका लागि नेकपा एमालेले आफ्नो घोषणा पत्र तथा समानुपातिकतर्फको नामावली तयार गरेर समयमै बुझाउने तयारी गरेको पनि भट्टराईले जानकारी दिए।
यो पनि पढ्नुहोस्
