पहिरोले लियाे एकै परिवारका चार जनाको ज्यान
गुल्मी । गुल्मीको मुसिकोट नगरपालिका–१ बिसौनामा पहिरोले दुई वटा घर पुरिँदा चार जनाको ज्यान गएको छ । पहिरोमा पुरिएर दुई जना घाइते भएको जिल्ला प्रहरी कार्यालय गुल्मीका प्रहरी उपरीक्षक (एसपी) राजन भुजेलले जानकारी दिए ।
विष्णु विक र हुकुम विकको घर भत्कँदा परिवारका अन्य दुईसहित चार जनाको निधन भएको हो । एसपी भुजेलका अनुसार, पहिरोमा पुरिएर ४८ वर्षका गोरे विक, ६७ वर्षका हुमुक विक, साढे दुईवर्षका रियन्सा विक र ६६ वर्षकी मसुरी विकको मृत्यु भएको हो ।
एसपी भुजेलले भने, ‘उहाँहरू एकै परिवारका सदस्यहरू हुनु भएको खुलेको छ। दुईवटा घरमा छुट्टाछुट्टै बसेको अवस्थामा पहिरो खसेर घर पुरिएको रहेछ ।’ पहिरोमा पुरिएर मुना विक र बिष्णु विकलाई स्थानीयले उद्धार गरेर नजिकैको स्वास्थ्य चौकी उपचार गराइएको छ । ‘अहिले मुचुल्का उठाएर प्रहरीको टोली त्यसतर्फ पुगेको छ । बिहान ९ बजे पहिरो गएको हो,’ उनले भने । घाइतेहरू बोल्न सक्ने अवस्थामा रहेको बताइएको छ ।
