गर्मीका कारण एकैदिन २७ जनाको मृत्यु

वेलकम खबर
जेष्ठ १८, २०८१

एजेन्सी । भारतमा अत्यधिक गर्मीका कारण एकैदिन २७ जनाको मृत्यु भएको छ। भारतीय स्वास्थ्य मन्त्रालयका अनुसार बिहार, झारखण्ड र ओडिशामा बिहीवार २७ जनाको अत्यधिक गर्मीका कारण मृत्यु भएको हो। गर्मीका कारण २० भन्दा बढी मानिस अस्पताल भर्ना भएका छन्।
बिहारका विभिन्न स्थानमा बिहीवार ४४ डिग्री सेल्यिस तापक्रम मापन गरिएको छ भने ३ जिल्लामा गरी २० जनाको लू लागेका कराण मृत्यु भएको छ।
यस्तै झारखण्डको पलामू जिल्लामा ५ जनाको मृत्यु भएको छ भने ओडिशा राज्यमा १० जनाको गर्मीका कारण मृत्यु भएको छ।
भारतको विभिन्न राज्यमा पछिल्लो केहीदिन यता तापक्रम उच्च स्तरमा पुगेको छ। जसका कारण विभिन्न राज्यमा रेड अलर्ट जारी गरिएको छ भने बाहिर काम गर्ने मजदुरहरूलाई गर्मीमा काम नगर्न निर्देशन दिइएको छ।
झारखण्डको पलामूमा बिहीवार ४७ डिग्रीभन्दा बढी तापक्रम मापन गरिएको छ। यस्तै राजधानी दिल्लीमा पनि बुधवार ४२ डिग्री तापक्रम मापन गरिएको थियो भने गुजरातमा ४५ देखि ४६ डिग्री तापक्रम मापन गरिएको छ।राजस्थानमा गत साता मात्रै ४२ डिग्री तापक्रम पुग्दा गर्मीका कारण ५ जनाको मृत्यु भएको थियो।
भारतीय मौसम विभागका अनुसार आगामी केही दिन अझै बिहारसहित देशका विभिन्न भागमा तापक्रमको स्तर बढ्ने छ। त्यसकारण अनावश्यक घरभन्दा बाहिर ननिस्कन र सावधानी अपनाउन विभागले आग्रह गरेको छ।
अत्यधिक गर्मीकै कारण भारतका विभिन्न राज्यमा विद्यालय, कलेज तथा कार्यालयहरू पनि बन्द गरिएका छन्।

यसमा तपाइको मत

Your email address will not be published. Required fields are marked *


*